Exclusive FREE session on RIG VEDA for you, Register now!
Exclusive FREE session on RIG VEDA for you, Register now!

Kanan Bala Nayak

Others


5.0  

Kanan Bala Nayak

Others


କାଞ୍ଜି ଅଅଁଳା ଓଷା

କାଞ୍ଜି ଅଅଁଳା ଓଷା

3 mins 406 3 mins 406


     ଦୀର୍ଘ ବାର ତେର ବର୍ଷ ପରେ କୀର୍ତ୍ତନ ମଉସା ଓ ଉମା ମାଉସୀ ଙ୍କ ସହ ଦେଖା । ଦେଖା ହେବା ପରେ ମାଉସୀ ମୋତେ ଏମିତି ଭାବରେ କୋଳାଇ ନେଲେ ସତେ ଯେମିତି ବହୁତ ଦିନ ରୁ ହଜି ଯାଇଥିବା ନିଜର ଅମୂଲ୍ୟ ରତ୍ନ ଟିଏ ଖୋଜି ପାଇଛନ୍ତି । ମଉସା ମୋତେ ଦେଖୁ ଦେଖୁ କହିଲେ, ତୁ ଟିକେ ଏପଟେ ଆସିଲୁ ତୋତେ ଟିକେ ଦେଖେ । ମଉସାଙ୍କ ପାଖରୁ ଏଇ କଥା ପଦକ ଶୁଣି ମୋତେ ଲାଗିଲା ଦୀର୍ଘ ଦିନ ପୂର୍ବରୁ ଇହଧ୍ୟାମ ତ୍ୟାଗ କରିଥିବା ମୋ ବାପା ଯେମିତି ମୋ ସାମ୍ନାରେ ଛିଡ଼ା ହୋଇଛନ୍ତି । ଉମା ମାଉସୀ ଓ କୀର୍ତ୍ତନ ମଉସା ହେଉଛନ୍ତି ମୋ ସାଙ୍ଗ ଭାରତୀର ବାପାମାଆ । ହେଲେ ଦୁଇ ଜଣ ସାରା ମୋତେ ନିଜ ଝିଅ ଠାରୁ ଅଧିକ ସ୍ନେହ କରନ୍ତି ।


      ତାଙ୍କ ଘର କେନ୍ଦୁଝର ଜିଲ୍ଲାର ଭାଟସିରା ଗାଁ ରେ । ରେଭେନ୍ସା କଲେଜରେ ପି . ଜି . କରୁଥିବା ସମୟରେ ଛୁଟି ସମୟରେ ମୁଁ ବେଳେ ବେଳେ ଭାରତୀ ସହ ତାଙ୍କ ଘରକୁ ଯାଏ । କାରଣ ଖାଲି ଭାରତୀ ଘର ଲୋକ ନୁହଁନ୍ତି ତାଙ୍କ ଗାଁ ସାରା ଲୋକ ମୋତେ ଭାରୀ ସ୍ନେହ କରନ୍ତି । ଯେହେତୁ ମଉସା ମାଉସୀ ଙ୍କ ସହ ଅନେକ ଦିନ ପରେ ଦେଖା ହୋଇଥିଲା ମୁଁ ତାଙ୍କୁ ଗାଁର ସମସ୍ତ ଙ୍କ ବିଷୟରେ ପଚାରିଲି । ଶେଷରେ ପଚାରିଲି ମାଉସୀ ତୁମ ଗାଁ ରେ ଆଉ କାଞ୍ଜି ଅଅଁଳା ଓଷା ପାଳନ କରୁଛ ନାଁ ନାହିଁ? ମୋତେ ତୁମ ଗାଁ ର ସେଇ ପର୍ବ ଟା ଭାରୀ ଭଲ ଲାଗେ ।


      ଥରେ ପ୍ରଥମାଷ୍ଟମୀ ରେ ମୁଁ ଭାରତୀ ସହ ତାଙ୍କ ଗାଁ କୁ ଯାଇଥାଏ । ତା ପର ଦିନ ଘରକୁ ଫେରିବା ପାଇଁ ବାହାରିବା ରୁ ମାଉସୀ ମୋତେ କହିଲେ ଆଜି ରହିଯାଆ ସନ୍ଧ୍ୟା ବେଳେ ଆମ ଗାଁ ରେ କାଞ୍ଜି ଅଅଁଳା ଓଷା ପାଳନ କରାଯିବ ଦେଖିବୁ । ଆମ ଗାଁ ରେ ଏଇ ଓଷା ପାଳନ କରାଯିବା ତ ଦୂରର କଥା ତା ନାଁ ମଧ୍ୟ ମୁଁ ଶୁଣି ନଥିଲି(ଏବେ ବି ଆମ ଗାଁ ର ଅନେକ ଲୋକ ଏ ଓଷା ର ନାଁ ଶୁଣି ନାହାଁନ୍ତି) । ତେଣୁ ମନ ମଧ୍ୟରେ ଉତ୍କଣ୍ଠା ଜାଗ୍ରତ ହେଲା ଏଇ ପର୍ବ କେମିତି ପାଳନ କରାଯାଏ ଦେଖିବା ପାଇଁ । ତେଣୁ ମାଉସୀ ଙ୍କ କଥା ଅନୁଯାୟୀ ସେ ଦିନ ତାଙ୍କ ଗାଁ ରେ ରହିଲି ।  


       ଏହି ଓଷାର ବିଶେଷତ୍ୱ ହେଉଛି ସନ୍ତାନ ସନ୍ତତିଙ୍କ ମଙ୍ଗଳ କାମନା ଉଦ୍ଦେଶ୍ୟରେ ଓ ନିଃସନ୍ତାନ ନାରୀମାନେ ସନ୍ତାନ ପ୍ରାପ୍ତି ପାଇଁ ମା’ ଷଠୀଦେବୀଙ୍କ ନିକଟରେ ପୂଜାର୍ଚ୍ଚନା କରିଥାନ୍ତି । ଷଠୀଦେବୀ ହେଉଛନ୍ତି ଭଗବାନଙ୍କ ଏକ ଅନନ୍ୟ ସ୍ୱରୂପ ଯିଏକି ସନ୍ତାନସନ୍ତତିଙ୍କ ଭାଗ୍ୟ ନିର୍ଦ୍ଧାରଣ କରନ୍ତି । ଓଷାର ପରମ୍ପରା ଅନୁସାରେ ଗାଁ ର ସ୍ତ୍ରୀ ଲୋକ ମାନେ ଦିନ ସାରା ଉପବାସ କରିଥାନ୍ତି । ସନ୍ଧ୍ୟା ବେଳେ ଗାଁ ମଝିରେ ଥିବା ତୁଳସୀ ଚଉରା ମୂଳରେ ପୋଖରୀ ପରି ଗୋଟିଏ ଛୋଟ ଚାରିକୋଣିଆ ଗାତ ଖୋଳି ତହିଁରେ ପାଣି ଭରିଲେ । ପୋଖରୀରୁ ଛୋଟ ଛୋଟ ମାଛ ଆଣି ଏଥିରେ ଛାଡ଼ିଲେ । ଏହି ଗାତ ଚାରିପଟେ ବାଳୁଙ୍ଗା ଧାନ ପୋତିଲେ । ପୋଖରୀ ମଝିରେ ସାରୁ ଗଛ ଟିଏ ପୋତି ତା'ରି ମୂଳରେ ପିଢ଼ାଟିଏ ମଧ୍ୟ ଥୋଇଲେ । ସାତଟି ପିତା ଶୁଖୁଆ ଆଣି ସେଗୁଡ଼ିକୁ ହଳଦୀ ପାଣିରେ ଧୋଇ ହଳଦିଆ କନାରେ ଗୁଡ଼ାଇ ବୋହୁପରି ବେଶ କରି କଜ୍ଜ୍ୱଳ, ସିନ୍ଦୂର ଲଗାଇ ପିଢ଼ା ଉପରେ ବସାଇଲେ । ଗୋଟେ ନୂଆ ଶିଳପୁଆ ଆଣି ତାକୁ ଧଳା ଲୁଗାରେ ଗୁଡ଼ାଇ ଷଠୀ ଠାକୁରାଣୀ କଲେ । ଶୁଖୁଆ ଗୁଡିକୁ ଠାକୁରାଣୀଙ୍କ ଆଗରେ ଏମିତି ଭାବରେ ରଖିଲେ ସତରେ ଯେମିତି ସାତଟି ବୋହୂ ଠାକୁରାଣୀଙ୍କ ବନ୍ଦାପନା କରୁଛନ୍ତି । ପ୍ରତିଟି ଶୁଖୁଆ ପାଖରେ ଗୋଟିଏ ଲେଖାଏ ପୋଇ ଖାଡ଼ି ରଖିଲେ । 


       ଏମିତି ଭାଵେ ସମସ୍ତ ବିଧି ବିଧାନ ସହ ଗାଁ ର ସମସ୍ତ ସ୍ତ୍ରୀ ଲୋକ ମିଶି ଷଠୀ ଠାକୁରାଣୀଙ୍କ ପୂଜା ସମାପ୍ତ କଲେ । ଭୋଗ ସରିଲା ପରେ ସେଇ ଭୋଗକୁ ତାଙ୍କ ପିଲା ମାନଙ୍କୁ ଖାଇବା ପାଇଁ ଦେଲେ ଓ ଅବଶିଷ୍ଠ ଭୋଗ ନଦୀରେ ଭସାଇ ଦେବା ପାଇଁ ରଖିଲେ । ପୂଜା ସମାପ୍ତ ହେଲା ପରେ ଗାଁ ର ସମସ୍ତ ସ୍ତ୍ରୀ ଲୋକ ନିଜ ଘରୁ ତିଆରି କରି ଆଣିଥିବା ନାନା ପ୍ରକାର ବ୍ୟଞ୍ଜନ କୁ‌ ଗାଁ ଦାଣ୍ଡରେ ବସି ଏକତ୍ର ଭୋଜନ କଲେ । ଆମ‌ ଗାଁ ର‌ ସବୁ ସ୍ତ୍ରୀ ଲୋକଙ୍କୁ କୈାଣସି ବି ପର୍ବ ପର୍ବାଣୀ ରେ ଏମିତି ଏକାଠି ବସି ଖାଇବାର ମୁଁ ଦେଖି ନଥିଲି । ତେଣୁ ମୁଁ ମନେ ମନେ ଭାବୁଥିଲି ଆମ ଗାଁ ରେ ଏମିତି ପର୍ବ ଟେ ପାଳନ ‌ହୁଅନ୍ତାନି ।


       ତାପର ଦିନ ମୁଁ ଘରକୁ ଫେରିଆସିଲି ହେଲେ ତାଙ୍କ ଗାଁ ରେ ସେଦିନ ର ସେଇ ଓଷା ପାଳନ ଓ ସ୍ତ୍ରୀ ଲୋକ ମଧ୍ୟ ରେ ଥିବା ସ୍ନେହ ମମତାର ବନ୍ଧନ ଏ ପର୍ଯ୍ୟନ୍ତ ମୋ ମନରେ ଵସା ବାନ୍ଧି ରହିଥିଲା । ହେଲେ ମାଉସୀ ଙ୍କ ଉତ୍ତର ସେ ଦିନ ମୋତେ ଦୁଃଖି କରି ଦେଇଥିଲା । ମାଉସୀ କହିଲେ ଆଲୋ ମାଆ ସେଦିନର ସେଇ ଗାଁ, ଆଉ କଣ ସେଇ ଗାଁ ହୋଇ ରହିଛି? ନାଁ ଗାଁ ଲୋକଙ୍କ ଭିତରେ ଥିବା ସେଇ ସ୍ନେହ, ମମତା ଓ ଆନ୍ତରିକତା ଆଉ ତାଙ୍କ ଭିତରେ ଜୀବିତ ଅଛି? ସଵୁ କିଛି ବଦଳି ଗଲାଣି । ଗାଁ ଦାଣ୍ଡରେ ଆଉ କାଞ୍ଜି ଅଅଁଳା ଓଷା ପାଳନ ହେଉନି । ସାମାନ୍ୟ ସାମାନ୍ୟ କଥାରେ ପରସ୍ପର ଭିତରେ କଳି ଗୋଳ ଲାଗି‌ ଓଷା ପାଳନ ପରା କେବେରୁ ବନ୍ଦ ହେଲାଣି ।


       ମାଉସୀଙ୍କ କଥା ଶୁଣି ମୋତେ ଲାଗିଲା ସାମାନ୍ୟ ସାମାନ୍ୟ କଥାରେ କଳି ଗୋଳ ଲାଗି ଯଦି ଗାଁ ମାନଙ୍କରେ ଏମିତି ସୁନ୍ଦର ପର୍ବ ପାଳନ ସବୁ ବନ୍ଦ ହୋଇଯିବ ,ତେବେ ଆମର ପର୍ବପର୍ବାଣୀ ଓ ପରମ୍ପରା ସବୁ ଜୀବୀତ ରହିବ କେମିତି?


Rate this content
Log in