ମାଆ ଲକ୍ଷ୍ମୀଙ୍କ ମକର ଭାର

ମକର ସଂକ୍ରାନ୍ତି ଦିନ କି ବିଚାରି ମୁହିଁ

ଶିରିକ୍ଷେତ୍ର ଗଲି ଜଗା ଦରଶନ ପାଇଁ l

ଦେଖିଲି ସେବକ ଗଣ ବଡ଼ ତତପର

ଲକ୍ଷ୍ମୀଙ୍କର ବାପଘରୁ ଆସିଅଛି ଭାର l

ଧନୁ ସଂକ୍ରାନ୍ତିରୁ ଯାଇଥିଲେ ବାପଘର

ମକରେ ଫେରିଲେ ଧରି ମକରର ଭାର l

ପିତା ରତ୍ନାକର ଜଗନ୍ନାଥ ଜୋଇଁ ପାଇଁ

ଜାମା ଯୋଡ଼ ଅଳଙ୍କାର ଅଛି ପଠିଆଇ l

ଆରିସା,ମାଲପା ଆଦି ନାନାଜାତି ପିଠା

ମକର ଚାଉଳ ପୁଣି ସଙ୍ଗତରେ ମିଠା l

ଶାଶୁ ବରୁଣାଣି ବଡ଼ଖିଆ ଜୋଇଁ ପାଇଁ

ବ୍ୟବସ୍ଥା କରି ଅଛନ୍ତି ସିନ୍ଧୁରାଜେ କହି l

କାଳିଆର ମନେ ନାହିଁ ଟିକିଏ ସରାଗ

ଲକ୍ଷ୍ମୀଙ୍କ ଉପରେ ତାଙ୍କ ପଞ୍ଚମରେ ରାଗ l

ଏକ ମାସ ହେଲା ଭଲ ଲକ୍ଷ୍ମୀ ଯାଇଥିଲା

ମାଆ ଭୁଞ୍ଜାଇଲେ କରି ମତେ କେତେ ଗେହ୍ଲା l

ସେ ଅମୃତ ଏବେ ମୋତେ ଦୁର୍ଲଭ ହୋଇବ

ସାଗର ଦୁଲଣୀ କାହୁଁ ସେ ଅମୃତ ଦେବ l

ମହାଲକ୍ଷ୍ମୀ ରୋଷ ହେଲେ ଏକଥାକୁ ଜାଣି

ହଉରେ କାଳିଆ ତୋତେ ପିଆଉଛି ପାଣି l

ଖାଇ ମୁଁ ଫେରି ଆସିଲି ଦୁଇ ଗୋଟି ଖଜା

ଧନ୍ୟରେ କାଳିଆ ତୋର କମଳା ଭାରିଜା ।