Library
ଧୋକା
ଧୋକା
ସ୍ୱାର୍ଥପରବସେ ଭଣ୍ଡ ପ୍ରତାରକ
ଦିଅନ୍ତି ଜୀବନେ ଧୋକା
ଦୟାମାୟାହୀନ ପାଷାଣ ହୃଦୟେ
ଅନ୍ୟକୁ ବନାଇ ବୋକା ॥
ସତ୍ୟ ଧର୍ମ ନ୍ୟାୟ ପ୍ରତି ତିଳେହେଲେ
ନରଖି ମନରେ ଭୟ
କରନ୍ତି ପ୍ରୟାସ ଜନ୍ମାଇ ବିଶ୍ୱାସ
ଲଙ୍ଘିବାକୁ ହିମାଳୟ ॥
ପ୍ରେମିକ ଚାଟୁରେ ହୋଇ ମଂତ୍ରମୁଗ୍ଧା
ପ୍ରେମିକା ବନଇ ବୋକା
ଅନୂଢା ଅଚିରେ ହୁଏ ଅନ୍ତଃସତ୍ତ୍ୱା
ବିବାହ ବନ୍ଧନେ ଧୋକା ॥
ସୁନ୍ଦରୀ ତରୁଣୀ ମଡେଲ୍ ନିଶାରେ
ଖାଏ ଧୋକା ବ୍ୟାଭିଚାରେ
ଧୋକା ବି ଦଅନ୍ତି ଅସାଧୁ ବିଲ୍ଡର
ଜମିବାଡି କାରବାରେ ॥
କ୍ଷୁଦ୍ରଜମାକାରୀ ସୁଧ ପ୍ରଲୋଭନେ
ହୋଇଥାନ୍ତି ସର୍ବସାନ୍ତ
ଅଧୂରା ସପନ ନହୋଇ ସାକାର
ରହିଥାଏ ଅସମାପ୍ତ ॥
ସୁନାର ହରିଣୀ ପଛରେ ଗୋଡାଇ
ନିଜେ ପ୍ରଭୁ ରଘୁବୀର
ଖାଇଛନ୍ତି ଧୋକା ବନବାସ ବେଳେ
ହୋଇମଧ୍ୟ ଧନୁର୍ଦ୍ଧର ॥
ନିଜେ ସୀତାମାତା ଖାଇଛନ୍ତି ଧୋକା
ରାବଣ ନେଲା ଚୋରାଇ
ଶକୁନି ମାମୁଁର ପଶାଖେଳେ ଗଲା
କୁରୁବଂଶ ଧ୍ୱଂସ ହୋଇ ॥
ସରଳ ବିଶ୍ୱାସୀ ନିଷ୍କପଟ ବ୍ୟକ୍ତି
ଖାଆନ୍ତି ଜୀବନେ ଧୋକା
ହୋଇ ସାବଧାନ ରହିଲେ ସତର୍କ
ନଥାଏ ଜମାରୁ ଦକା ॥
(ସଦାନନ୍ଦ ପ୍ରତିହାରୀ)
mobile no-9937367709
Email address-snpratihari7@gmail.com
Date -12-10-2018
