ବଜାନ୍ତି ତେଲିଙ୍ଗି ବାଜା

ପହିଲି ବରଷା ଛୁଆଁରେ ମୋ ଗାଆଁ

ଚନ୍ଦନ ଚନ୍ଦନ ବାସେ ,

ନାଲି ପାଟ ପିନ୍ଧି ସାଧବବୋହୂଟି

ମୁରୁକି ମୁରୁକି ହସେ ।

ଚାଷୀ ଭାଇ ଯାଏ ଗହୀରବିଲକୁ

କାଳିଆ କଷରା ନେଇ,

ମନ ହରଷରେ ବିହନ ପକାଏ

କେତେ ବାଗେ ଗୀତ ଗାଇ ।

ତରତର ହୋଇ ସନିଆ ଭାରିଜା

ପୋଖରୀ ତୁଠକୁ ଧାଏଁ ,

ତା' ଝିଅକୁ ଆଜି ଦେଖି ଆସୁଛନ୍ତି

ପଚାରିଲେ କିଏ କହେ ।

ପିଲାମାନେ ମିଶି ବାଗୁଡ଼ି ଖେଳନ୍ତି

ବରଷାରେ ଭିଜି ଭିଜି ,

ଅଜା,ଆଈ ବସି ହୋ'ନ୍ତି କୁହାକୁହି

ପିଲାଦିନ ଗଲା ହଜି ।

ଆଜି ଆମେ ଯଦି ପିଲା ହୋଇଯା'ନ୍ତେ

ଖେଳନ୍ତେ ଏମିତି ଖେଳ ,

ତୁମ ପୁଚି ଖେଳ ଦେଖି ଦେଖି ମୋର

କଟି ଯାଉଥା'ନ୍ତା ବେଳ ।

କଙ୍କି,ଝଡ଼ିପୋକ ଆକାଶଟା ସାରା

ଦେଖି ଲାଗୁଅଛି ମଜା ,

ମନ ହେଉଅଛି ବରଷାରେ ଭିଜି

ବଜାନ୍ତି ତେଲିଙ୍ଗି ବାଜା ।