ଅପେକ୍ଷା ର ହେବ ଅନ୍ତ

ତୋ ଅପେକ୍ଷା ରେ ରାତି ସରେ ମୋର

ସପନ ଦୋଳି ରେ ଝୁଲି

ଗୋଟି ଗୋଟି ସ୍ମୃତି ଏକାଠି ସଜାଏ

ସ୍ନେହର ପରଶ ବୋଳି ।

ସରିଯାଏ ରାତି ତୋ ସ୍ମୃତିକୁ ସଜାଇ

ଅପେକ୍ଷା ର ହୁଏନି ଅନ୍ତ

ଫୁଲର ଫଗୁଣ ଆସେନାହିଁ କେବେ

ପାଏନି ତୋତେ ଜୀବନ୍ତ ।

ଉଡ଼ିବୁଲେ କେବେ ସୁନୀଳ ଗଗନେ

ମୁକ୍ତ ବିହଙ୍ଗଟେ ହୋଇ 

ସ୍ମୃତିରେ ସ୍ମୃତିରେ ଥାଉ ସାଥେ ମୋର

ଅଝଟିଆ ମନ ନେଇ ।

ମାଳ ମାଳ ସ୍ବପ୍ନ ନୟନର ଧାରେ

ତତେ ନେଇ ଦେଖିଥିଲି

ଅପେକ୍ଷା ରେ ମୋତେ ଛାଡି ଦେଇ

ଏକାକରି ଗଲୁ ଚାଲି ।

ବାଇ ଚଢେଇର ଅଧାଗଢା ବସାରେ

ଏବେବି ରହିଛି ଚାହିଁ

ସତରେ ନହେଲେ ସପନରେ ଆସି

ଥରେ ମୋତେ ଯାଆ ଛୁଇଁ ।

ଖୁସିର ଜୁଆର ଛୁଟି ଆସିବ ମୋ

ପାଇ ତୋ ଅମୃତ ସ୍ପର୍ଶ

ତୋ ମୁହଁ ଦେଖି ଭୁଲିଯିବି ସବୁ

ମୋ ଅପେକ୍ଷା ର ହେବ ଅନ୍ତ ।