येरे घना येरे घना‌‌

ढगांच्या वाजुदे ढोलताशा

वाऱ्याची वाजुदे सनई

सरींच्या तालावर होऊदे

विद्युतलतेची रोषणाई l

पडूदे एकात्मतेचा पाऊस

वाहुदे सहकार्याचा वारा

चमकूदे सुविचाराची वीज

पडुदे आनंदाच्या गारा l

वाहुन जाऊदे दुःखाचे डोंगर

सरींनी करुदे आनंदाचं शिंपण

विजेने चमकूदे सत्याचा प्रकाश

स्वार्थ स्वैराचारा घालूदे लिंपण l

बळीराजाने केली मशागत शेतीची

ओसंडून ये आता धरणीवरती

कष्ट कितीही होवो आम्हा

पिकवू सकलांना माणिक मोती l

तापलेल्या धरतीला मिळूदे गारवा

वेळ नको लावू आता बरसायला

मेघराज आला वाजत गाजत

आता पावसात भिजायचं मला l

अखंड सृष्टीला मिळते

तुझ्या येण्याने जीवदान

वृक्षारोपण आणि संगोपन

करण्याची घेऊ आण l