वसंत प्रीतीचा

शिशिर पानगळ तळ

जीव कासावीस झाला

निसर्गाची बघा किमया

गुलमोहर फुलून आला||१||

कोवळे हे कोंब हलकेच

डोकावी बघा नकळतच,

नवलाईच्या हिंदोळ्यावर

वसुंधरा झुले सहजच ||२||

गानकोकीळा गाते मंजुळ

गेली कुठे सांगा हिरवळ

पटमधलं पाणी झुळझुळ

या धरतीचं रूप आगळ ||३||

वृक्ष लता नटून सजल्या

ओल्या चिंब दवात भिजल्या,

आठवणी ज्या मनी रुजल्या

डोळ्यातूनी वाहू लागल्या||४||

रंगरूप बघ बदलला

माझ्यासवे या सृष्टीचा

सख्या भेटणार म्हणोनी

फुले वसंत प्रीतीचा||५||