विठ्ठल रुक्मिणी मम हृदयी

माता पिता भागवत भक्त

वसता मम या हदयांतरी|

जावे का मी मग दर्शना

विठूरायाच्या त्या पंढरी?||१||

जरी नसे मातृ पितृ भक्त मी

विठ्ठल भक्त पुंडलिका परी|

नसे श्रावणबाळ कावडीत

अंध माता पिता ते खांद्यावरी||२||

मी सामान्य लेक जी ठेवी

स्मृती माता पित्यांची अंतरी|

करावी वाटेल कशी मग मज

आषाढी कार्तिकीची वारी?||३||

प्रेमळ अशा माता पित्याचे

असता आशिर्वच मम शिरी|

मग काय करावे नसते जाऊन

विठ्ठल रुक्मिणीच्या नगरी||४||

कस्तुरी नाभित असता वणवण

धुंडीत फिरतो का मृग कस्तुरी|

ह्दयातच विठ्ठल रुक्मिणी असता

जावे कां मी अन्य मंदिरी?||५||