उजाड

डोंगर माथा उजाड सारा

नाही कोठे शीतल छाया

भयाण भकास सारे वाटे

कोठे विरली निसर्ग माया

पशु पक्षी सारेच हवालदिल

नाही राहिला कोठे निवारा

कसे आटले सारेच पाणवठे

कोठे शोधावा निवांत किनारा

साज हिरवळीचा सारा हरपला

उष्ण उनाड वाहतो वारा

दोष द्यावा कुणा मानवा

कशी वाचेल सांग धरा

भविष्य आहे कठिण दोस्ता

घ्यावा ध्यास आपण आता

समतोल सांभाळू सारा निसर्गाचा

तरच वाचेल भूमी माता

तुझ्या माझ्या मनात दाटलेला

देऊ सोडून हव्यास सारा

ओरबाडून घेण्याची टाकून लत

जाऊ निसर्गाच्या जवळ जरा