तुझंच प्रेम भावलं

तुझ्यापासून दूर असताना 

मनाला खूप समजावलं 

ओढ तुझी वाढत गेली 

तुझंच प्रेम भावलं ||0||

तूझ्या आठवणींच्या सागरी 

चिंब चिंब नाहलो मी 

तृष्णा तुझी वाढता वाढता

इतका अधीर जाहलो मी 

मन सतत वेडं होऊन 

तूझ्या दिशेने धावलं 

ओढ तुझी वाढत गेली 

तुझंच प्रेम भावलं ||1||

समजूत काढली माझ्या 

अल्लड मनाची सवडीने 

तुलाच हृदयात सजवलं 

माझ्या मनाच्या आवडीने 

सारं जग पाहीलं मन 

तूझ्याकडे सरसावलं 

ओढ तुझी वाढत गेली 

तुझंच प्रेम भावलं ||2||

इतकं सोपं नसतं इथे 

प्रेम निभावून नेणं 

निसर्गाची देणगी ही 

परमेश्वराचं लेणं 

पाहिलं तुला पहिल्या नजरेत 

मन माझं धजावलं 

ओढ तुझी वाढत गेली 

तुझंच प्रेम भावलं ||3||