स्वामिनी

तू आकाशातली वीज, तू नदीतील पाणी

तू शांत सकाळ, तू तांबूस संध्याराणी

तुझिया पदरात सामावले आकाश ग राणी

दे सोडून सारी बंधने, तू तुझीच स्वामिनी ||

तू सावित्रीबाई फुले जिने साक्षर स्त्रीला केले

तू रमाबाई रानडे जिने स्त्री हक्क जाणिले

तू डॉ. आनंदी गोपाळ जी स्त्रीजीवा जाणी

दे सोडून सारी बंधने, तू तुझीच स्वामिनी ||

तू कल्पना चावला घातली आकाशा गवसणी

तू मेरी कॉम बॉक्सर विश्वविक्रमी

तू लता मंगेशकर गाशी मंजुळ गाणी

दे सोडून सारी बंधने, तू तुझीच स्वामिनी ||

जरी उडालीस आकाशी चित्त तुझे घरापाशी

कितीही मोठी झालीस तरी प्रथम तू गृहिणी

तू माता तू भगिनी तू राजाची राणी

दे सोडून सारी बंधने, तू तुझीच स्वामिनी ||

किती किती रूपे तुझी या जगती

मग का ग तुजवर अत्याचार होती ?

उठ घेऊन शस्त्र हे रणरागिणी

दे सोडून सारी बंधने, तू तुझीच स्वामिनी ||

नको सोसू तू छळ, नको मानूस हार

आठव रूप दुर्गेचे, करी दुष्टांचा संहार

तू दुर्गा, तू काली, तू माता राणी

दे सोडून सारी बंधने, तू तुझीच स्वामिनी ||