सुगी

धो धो पडला पाऊस

भिजली काळी रानं

बियांना फुटलं कोंब

कोंबाला फुटली पानं

कडाक्याच्या थंडीत

कधी धुके पडते दाट

पेरु बोरं खाण्यासाठी

खुणवते रानाची वाट

ज्वारी गहू हरभऱ्याची 

जेंव्हा सुगी होईल सुरु

रानमेवा चाखण्यासाठी 

रानात हुरडापार्टी करु

घरदार राबलं रानात 

धनधान्य खूप पिकलं

बुजगावणं साथीला

त्यानही पिकं राखलं

सुगीमध्ये रानोरानी

कापणी मळणी सुरू

स्वच्छ करुन धनधान्य 

पोत्या पोत्यामध्ये भरु

सुगीमध्ये धनधान्याच्या

तयार व्हाव्या खूप राशी

अवंदाच्या या सुगीमध्ये 

कुणी ना राहो उपाशी!!!