संध्याराणी

रम्य सांजवेळी, पक्षी, घरट्यात परतले,

वाट पाही नेत्र ज्याची, वाजे न त्याची पावले!

घाली पिंगा वा-यावर, मेघ केशरी गगनी,

दूर प्रवासी, न येई कळ काहूरल्या मनी!

पापणीच्या काठातून, अश्रू वर्षा बरसते,

चिंब झाल्या नदीकाठी, रव पाकोळी करते!

ऐकू न येते तरी भिडते, अंतरात साद तुझी,

आर्त हाक देशी तू की, प्रीत खुळी म्हणावी माझी!

निशा सांगे, संध्याराणी, माझा निरोप देशील?

शुक्रतारा उगवला, चंद्रा, माघारी येशील?