समाजाची गती

समाज ? कुठे चालला आहे हा समाज ?

अंधारातून प्रकाशाकडे ? की शाश्वताकडून विनाशाकडे ?

कोण आहे वाली त्याचा , कोण आहे त्राता ?

गुण ज्याचे गावे असा , कोण आहे नेता ?

भ्रष्टाचाराच्या शेणात वाढताहेत , विचारविहीन बुळबुळीत किडे !

स्वच्छ , तेजस्वी , प्रकाशाचे , त्यांना आज वाटे वावडे !!

गुरंढोरं सुद्धा बाळगतात , विवेकशील बुद्धी ! 

पण माणसाची मात्र हरपली आहे आज , आत्म्याचीही शुद्धी !!

वाढते आहे गलिच्छ विचारांची वसती | 

संस्कृतीची देवालये रोज ढासळताना दिसती ||

पालकच शिकवत आहेत मुलांना , भ्रष्टाचाराचे बोल बोबडे !

कुठे गेली ती जीजामाता , देत होती जी क्षात्रतेजाचे धडे ?

नको आहे कोणालाच आज , चारित्र्य तरुणांचे निधडे |

का चालला आहे हा समाज , शाश्वताकडून विनाशाकडे ?

शिक्षणाचा , आरोग्याचा , बाजार जगी का मांडला ?

मंदिरातून पावित्र्याचा मंगल गंध कोठे सांडला ? 

जाणीवांचे स्पंदन हरवून , भावना बनतेय निर्जीव दगड !

शासनकर्ते नादान म्हणून , समाज करतोय पोकळ ओरड ! 

फुटणार कधी ह्या दांभिकांच्या पापाचे भरले घडे ?

कुठे चालला आहे हा समाज ? अशांतीकडे ? अधोगतीकडे ?

का ? का चालला आहे हा समाज , शाश्वताकडून विनाशाकडे ?

आणि कधी चालणार हा माझा समाज अज्ञातातून विज्ञानाकडे ?

कधी चालणार हा माझा समाज तिमिरातून प्रकाशोकडे ?

तिमिरातून प्रकाशाकडे ?