सखे मला तू साद दे

मुक्या माझ्या प्रेमाला 

आज पुन्हा संवाद दे 

प्रेम पाठवलंय तुला 

सखे मला तू साद दे ||0||

तूझ्या होकाराची 

आस या जीवाला 

तूझ्या सहवासाचा 

ध्यास या जीवाला 

हर्षोल्हासित होईल मन 

मनी तो आल्हाद दे 

प्रेम पाठवलंय तुला 

सखे मला तू साद दे ||1||

भेट रोमँटिक स्मरते 

आजही पहिली आपली 

एक एक खूण भेटीची 

क्षणोक्षणी मी जपली 

बहर यावा प्रीतीला 

असा नवा उन्माद दे

प्रेम पाठवलंय तुला 

सखे मला तू साद दे ||2||

तुझंच पूजन हृदयी माझ्या 

तूच माझे प्रारब्ध 

तूच ईश्वराच्या जागी 

तूझ्या वीना सारे स्तब्ध 

कधीतरी प्रसन्न होऊन 

प्रेमाचा प्रसाद दे 

प्रेम पाठवलंय तुला 

सखे मला तू साद दे ||3||

सप्तसुरांच्या गोडव्याची 

महेफील जशी सजावी 

हृदयाच्या गाभाऱ्यातून 

प्रीत अशी उपजावी 

प्रेमाच्या भाषेचा हृदयी 

भिडणारा तू नाद दे 

प्रेम पाठवलंय तुला 

सखे मला तू साद दे ||4||

तुलाच बंद लोचनांनी 

स्पष्ट मी पाहतो 

गर्दीत असलो तरीही 

एकटा मी राहतो 

कधीतरी माझ्या रचनांना 

थोडीशी तू दाद दे 

प्रेम पाठवलंय तुला 

सखे मला तू साद दे ||5||