शर्यत

गजाननाची षडाननाची

शर्यत झाली सुरु

जमले देव ऋषी मुनी गुरु ||

षडानन तो बलवान

मयूर वाहन वेगवान

त्वरे निघाला निश्चय केला

जग प्रदक्षिणा ही करु ||१||

जमले देव ऋषी मुनी गुरु ||

गजानन तो बुद्धिमान

माय पित्यासी केले वंदन

मूषका्री आरुढ होऊन

केली प्रदक्षिणा तुरुतुरु ||२||

जमले देव ऋषी मुनी गुरु ||

यावरुनी जन बोध घ्या हो

मायपिता हे जग माना हो

जगी याहुनी श्रेष्ठ नाही

कोणी ही महागुरु ||३||

जमले देव ऋषी मुनी गुरु ||