शब्द मोतीयांची माळ

साज शब्दांचा बाई गं

कसा शब्दात मांडू

त्याचा सुगंधी पेटारा

कसा शोधून काढू

शब्द प्रेमाचा वाटे

मना मधूर गोड

क्रोधामध्ये तोच शब्द

जणू कारल्याची फोडं

शब्द गुंफता माळेत

बने मोतीयांची माळ

शब्द कोमल नाजूक

बोले बोबडे ते बाळ

शब्द पांगतात कधी

जेव्हा तुटते ही माळ

शब्द संपतात तिथे

पुढे पळतो काळ

शब्द निघता गळ्यातून

स्वर सुरात हसतो

शब्द एकच बाईपण

किती खेळ हा खेळतो