सचिन महात्म्य

रचल्या तू बाबा । विक्रमांच्या राशी ।

शब्द माझ्यापाशी । थिटे थिटे ॥

दाही दिशातुन । कौतुकाचे शब्द ।

सारे सारे लुब्ध । तुझ्यावरी ॥

कल्पक नेतृत्व । अफाट कर्तृत्व ।

यशाचे पितृत्व । तुझ्याकडे ॥

अचाट विक्रम । डोंगर धावांचा ।

मोठ्ठाल्या नावांचा । केला फडशा ॥

विक्रमांची यादी । किती तुझी थोर ।

एव्हढासा पोर । कीर्तिवान ॥

गोलंदाज किती । 'निर्घृण' फोडले ।

चेंडूला धाडले । कुठे कुठे ॥

आकाश ठेंगणे । घेता तुझा बळी ।

खुले त्यांची कळी । सुटलो म्हणे ॥

लेखकाच्या घरी । आश्चर्याचा जन्म ।

ठेवा हा आजन्म । देशाचा हो ॥

निष्ठेने साधना । कठोर प्रयत्न ।

भारताचे रत्न । सचिन हे ॥