सावट...

एकीकडे

आंधळ्या भक्तांना

दृष्टीचा साक्षात्कार झालेला दिसतोय

तर दुसरीकडे

स्वतःला डोळस म्हणवणारे

आंधळ्या सारखे वागताना दिसताहेत

कोणीच कोणाला ओळखेनासं झालंय

सर्वांचंच ताळतंत्र सुटलेलं दिसतंय..!!

ज्याचा त्याचा

केवळ कानावर भरवसा

न जाणे कुठून सुचते अवदसा

नक्राश्रूंच्या आडून

काही, भरू पाहताहेत आपला पसा

साले गल्लाभरू लोक

मृतांच्या टाळूवरचं

लोणी खाताना दिसतंय..!!

ज्यांच्यावर बेतलं

त्यांनी आपली हयात घालवली

ह्या नालायकांच्या रक्षणासाठी

आणि हे साले

राजकारण खेळताना दिसतंय

व्हाट्सअप फेसबुकच्या

मुलायम बिछान्यात लोळत

अकलेचे तारे तोडताना दिसतंय..!!

ज्यांना ठेचता येत नाही

स्वतःच्याच मनातील आंधळी कीड

असे हे कागदी वीर

दुश्मनांना ठेचून काढण्याची

भाषा बोलताना दिसतंय

हे फारच भयंकर चित्र आहे

वरवर एकवटलेला आपला देश

खरं तर,

दुफळीच्या सावटाखाली

वावरत असलेला दिसतोय..!!