सांग ना मला...

रूप माझं न्याहाळतोस सांग ना मला काय दिसतेय ,

पाहतोस का तो शुभ्र चंद्र सांग ना मला काय दिसतेय ...

ती पिवळी सकाळ कोवळी ओलावणारी दवं अबोली ,

रेशमी मऊशार शलाका सांग ना मला काय दिसतेय ...

रुपेरी वाळूत उन्हाची झळ शुष्क वाऱ्यात तुषार खारा ,

किनारा तू खुणावणारा सांग ना मला काय दिसतेय ...

स्वतःतच गुरफटलेली मी कळून सुद्धा न कळलेली मी ,

बासरीचा सूर तरीही पोकळ सांग ना मला काय दिसतेय ...

ती हिरवी धरणी लता लतिका यांनी सजलेली धजलेली मी ,

बंधनात तरी बंधने तोडणारी मी सांग ना मला काय दिसतेय...

प्रकाशमय जग माझे स्पंदनाचा गजर करते मांदियाळी जग ,

या डोळा दर्शन तू ईश्वरी करतेस सांग ना मला काय दिसतेय...

घडविली त्या ईश्वराने तरीही मला पाहता पेचात ब्रह्म पडते ,

काय घडवले मी या सुंदर हाताने सांग ना मला काय दिसतेय...

मी मंद प्रकाश किरणांचा स्मित रहस्यमय धारा बरसणाऱ्या ,

उगम माझा कुठे कधी कसा ना कळते सांग ना मला काय दिसतेय...

तो रंग निळा पिवळा गुलाबी नारंगी त्यावर रंग माझा चढते ,

हरवते मी माझ्यातच तरी तुझ्यात उरते सांग ना मला काय दिसतेय...

त्या तारका पदरात भरूनी ओंजळ रिती आसमंती करते ,

लुकलुकत अंधारातूनही डोकावते सांग ना मला काय दिसतेय...

मी सागराची लाट किनार्‍याला भिडते दुभंगते मागे फिरते,

विरते फेसाळते गोड अभंग होते सांग ना मला काय दिसतेय...