रयतेचा राजा

वाटते मनास माझ्या आज

शिवराय पुन्हा अवतरावे

जिजाऊंनी पुन्हा एकदा

छाव्यास जन्माला घालावे

यावे राजांनी पुन्हा एकदा

करावा तोच सर्वत्र पराक्रम

घुमावा नाद चौघड्यांचा

दुमदुमावे शौर्याने नभांगण

घडावा तोच मावळा पुन्हा

स्वराज्यासाठी अखंड झगडणारा

राजांच्या जीवासाठी, स्वतः

प्राण पणाला लावणारा

राजे, तुमच्या येण्याने नक्कीच

बदलेल महाराष्ट्राची दशा

कळून चुकले तरुणाईला

चुकलीय त्यांची दिशा

राजे या पुन्हा नव्याने 

आहात तुम्ही आमचे आधार

तुमच्या नसण्याने वाटते आहे

झालोत आम्ही निराधार