रूप ईश्वरी आई

त्यास लाभते आई ज्याची फळा येते पुण्याई ।

वात्सल्याचा सागर आई, रूप ईश्वरी आई ।।धृ।।

नऊ मास उदरात वागवी, किती कष्ट साहते ।

ढाल बनून ती उभी संकटी बाळापाठी राहते ।।

मातृत्वाची महान पदवी, वाटे तिज नवलाई ।।१।।

तळहाताच्या फोडा प्रमाणे बाळाला ती जपते ।

हाताचा पाळणा अन् दिवा पापणीचाही करते ।।

बाळाला निजवाया नेहमी गाते मधुर अंगाई ।।२।।

आई चरणी झुकवून माथा वंदन कोटी कोटी ।

देवाला प्रार्थना पुन्हा दे जन्म आईच्या पोटी ।। 

तिच्या ऋणातून सांगा कैसे व्हावे मी उतराई ।।३।।