रुसवा

राधा कोणावर रूसली

का गं यमुनातिरी बसली

गोपिका रुसवा तुझा काढिती

तू कोणाचे ना ऐकती

वेडे हट्ट कसला करशी

तू का बोलेना कृष्णाशी

ऐकून गोपींची बोलणी

राधा उठली गं चिडुनी

मजशी बोलू नका कोणी

काय मिळते मला चिडवुनी

जा येथून साऱ्या जणी

घेते कृष्णाला मी बघुनी

हाक मारी मज पाहुनी

हसतो माठ तो फोडुनी

किती सांगू तुम्हा गाऱ्हाणी

जातायेता मज छेडितो

बासरी गोड वाजवितो

माझा रुसवा क्षणात घालवितो

कसा हा जीव मला लावितो

जीव लावून खोडी करतो

रुसले की मला शोधितो

प्रेम करून मला लाजवितो

माझ्या हृदयी कायम राहतो

मी राधा त्या कृष्णाची

गोपिका सखी त्या राधेची