रसिका ....

मी प्रयत्न करतो केवळ

कोरण्यास काही लेणी

तुम्ही देता सुंदर दाद

ही ना फिटणारी देणी

पाठीवर तुमची थाप

मज मिळता वाटे धन्य

हे कर्जच रसिका मोठे

पण भूषण आहे मान्य

तुमचा नि माझा धागा

हा अतूट आहे आता

मी कृतज्ञतेने स्मरतो

अन टेकवितो हा माथा

ही दहा दिशांशी मैत्री

अन शब्दच बनले दूत

हे बंध रेशमाचे

हे मस्त सुगंधी सूत

जर चुकले माझे काही

तर खुशाल ओढा कान

अधिकार असे हा तुम्हा

तुमचाच असे हा मान

ओलांडून साऱ्या भिंती

धर्माच्या अन जातीच्या

लाभल्या तुम्हासम व्यक्ती

मज मायेच्या मातीच्या