रानमेवा

मित्रांसोबत रानामध्ये 

सुट्टीच्या दिवशी जावे

खट्टा मिठ्ठा रानमेवा 

मस्त पोटभरुन खावे 

हिरव्यागार रानामध्ये

आंब्याचं मोठ झाड

सोबतीला उभा तिथे

 एक उंचच उंच माड

काकडी मका गाजर

हरबऱ्याचे ताजे डहाळे

गोड गोड ऊस आणि

मोठे पाणीदार शहाळे

उंच उंच फांद्यांवरती

गाभुळले चिंच आकडे

सरसर चढा रे झाडावर

जशी चढतात माकडे

कैऱ्या बोरं जांभूळांन

गच्च भरलेली झाडं

दगडांनी नेम धरतात

दोस्तमंडळी ही द्वाडं

गावरान लज्जतदार 

काळ्या रानचा मेवा

रसरशीत चविष्ट असा

निसर्गाने जपला ठेवा

मित्रांसोबत मनसोक्त 

रानमेव्याची चव चाखू

निसर्गाची संपत्ती ही

साऱ्यांनी मिळून राखू!!!