प्रेम शोधा नवं नवं

माणसाचं माणसाशी 

माणुसकीचं नातं हवं 

दुःख विसरा चिघळलेलं 

आणि प्रेम शोधा नवं नवं ||0||

चेहऱ्यावर दुसऱ्यांच्या 

हास्य निर्माण करून बघा 

जीवन नाशवंत आहे 

प्रेम रंग भरून बघा 

एकच भावना मनी असावी 

तुमच्या अत्त दीप भवं 

दुःख विसरा चिघळलेलं 

आणि प्रेम शोधा नवं नवं ||1||

प्रत्येक वेळी जिंकण्याची 

सवय जरा सोडून बघा 

दुसऱ्यासाठी हरून जरा 

रीत ही मोडून बघा 

पुसून जरा बघा तुम्ही 

डोळ्यांची ओली आसवं 

दुःख विसरा चिघळलेलं 

आणि प्रेम शोधा नवं नवं ||2||

जात, धर्म, संप्रदाय 

पंथ, समाज, समुदाय 

गन, चाकू, अणुबॉम्ब 

व्यर्थ आहे सामुराय 

अभिप्रेत काय आहे 

व्यर्थ हा सारा तांडव 

दुःख विसरा चिघळलेलं 

आणि प्रेम शोधा नवं नवं ||3||

मरणानंतर जिवंत 

राहणं एक कला आहे 

इतकंच जगाने म्हणावं 

माणूस मात्र भला आहे 

जीवानिशी मारून टाका 

क्रूर मनातला दानव  

दुःख विसरा चिघळलेलं 

आणि प्रेम शोधा नवं नवं ||4||

माणसाच्या मनामध्ये 

ईश्वर शोधावा लागेल 

प्रेमाचा हा ओलावा 

मनात खोदावा लागेल 

देव नंतर बना तुम्ही 

प्रथम जरा व्हा मानव 

दुःख विसरा चिघळलेलं 

आणि प्रेम शोधा नवं नवं ||5||