पोशिंदा...

रातंदिन कष्ट करी

म्हणती तुला शेतकरी 

तू तर साऱ्यांचा पोशिंदा 

धरू नको फाशीचा फंदा

काळ्या काळ्या मातीतून 

पिकविशी अन्नकण 

तू तर अल्लाचा बंदा

धरू नको फाशीचा फंदा

तळपते माथी ऊन

निराशेचे येती क्षण 

मेघ बरसतील यंदा 

धरू नको फाशीचा फंदा

नको रडू नको कुढू

धीर नको असा सोडू

काळी आई पिकेल पुन्ह्यांदा

धरू नको फाशीचा फंदा

म्हणती तुला बळीराजा 

परि नसे गाजावाजा 

बळकट असे तुझा रे खांदा

धरू नको फाशीचा फंदा

खिल्लारी ही बैलजोडी 

घुंगुरमाळा पायी तोडी

कानी पडू दे या नादा

धरू नको फाशीचा फंदा

मुखी पडावे चार घास 

तुझी साऱ्यांना असे आस

परतवुनी आण या आनंदा

धरू नको फाशीचा फंदा