फुलपाखरु

दारात बहरले तेरड्याचे तरु

फुलाला पाहून आले फुलपाखरु 

लाल लाल फूलाचा मोहक रंग

फुलपाखरु फुलात झाले हो दंग

फुलपाखराचे पंख काळे काळे

पांढर्‍या रंगाचे त्यावर छान गोळे

फुलाच्या नाजूक पाकळीवर बसले

पाहून त्याला फूल गोड हसले

फुलाशी केली त्याने अशी दोस्ती

दोघांनी मिळून केली छान मस्ती

लाल लाल फुल ते उमलले मस्त

मधुरस केला फुलपाखराने फस्त

फुलासोबत त्याचा रंगला खेळ

 घरी परत जाण्याची झाली वेळ

हळूच उडाले ते फुलापासून लांब

फुल त्याला म्हणे जाऊ नको थांब

परत भेटण्याचे वचन दिले

ऐकून फुलाचे समाधान झाले

फुलांनी बहरता तेरड्याचे देठ

रोज रोज होते दोघांची भेट