पहिला पाऊस

आज पाऊस पहिला

 सारा निसर्ग नाहला

 आली तरारुन धरा

धुंद गंध मोहरला ॥

आज पाऊस पहिला

छळे विरही जिवाला

म्हणे सांगतो निरोप

दूर देशी सजनाला ॥

आज पाऊस पहिला

 बाहेर आणि आत

वाट पाहता सख्याची

सारे दिन आणि रात ॥

आज पाऊस पहिला

सार्‍यांसाठीच सोहळा

सार्‍या जगा करी धुंद

माझ्यासाठी का वेगळा? ॥

 आज पहिला पाऊस

वणवा रानचा विझला

माझ्या काळजात आग

तिचा भडका उठला ॥

आज पहिला पाऊस

मुक्त मयुर नाचती

विरहिणीच्या जीवाला

काटे बोचरे टोचती ॥

आज पहिला पाऊस

जणू सुखाचा सोहळा

माझ्या नयनीच्या धारा

ओघळती भळाभळा ॥

आज पहिला पाऊस

धरा गेली रे भिजुनी

माझ्या कोमेजल्या राना

तू ही जा ना भिजवूनी ॥

दाटे धन आभाळीचा

आली मृगाची ही सर

जा रे येऊन साजना

बघ झालासे कहर ॥