पायवाट

थांबावे कधीतरी

मागे वळून बघाया

चाललेली पाऊलवाट

निरखूनी त्या पहाया

चालले अनेक आजवर

परी कोणी ना वंदिले 

शिकलो पाऊलवाटेस 

हीन जाणोनी म्हणाया

रुतले असतील काटे

पण पुष्प ही पेरीले होते

दिसले कसे ना चांगले

का वाईट लागले भिनाया?

एकटे न चालू दिले

दिले वाटसरू ही अनेक

स्वार्थाशीच मैत्री करोनी

लागलो अर्थाचे गणित मांडाया

अंध पणाने कधी 

पडलो आपणच कारणाने

रस्ताच चुकीचा होता

लागलो त्यास हिणाया

आकाशीचे दिसते सुरेख

स्वप्नास आकांक्षांचे पंख

पायाखाली ही आहे कणखर

पण वय जाते कळाया

उभे रहा क्षणभर 

कर जोडोनी मनात

पाय जेथे पडले नी पडणार

त्या वाटेला स्मराया

जाणोनी रहा उपकार 

पायवाट साथ न सोडी

सदा पाया खाली जरी

खरी तीच वाट दाखवाया