पाऊस

जिव्हारी लागतो पाऊस

रात्रीस जागतो पाऊस

काय बिनसले कुणास ठाऊक

असा का वागतो पाऊस?

चिंब भिजतो पाऊस

मातीत रुजतो पाऊस

पाहता तिला माझ्यासवे

जागीच थिजतो पाऊस

माझ्याकडे पाहतो आहे

गाली रेंगाळतो पाऊस

पुस्तकात आठवांच्या

टिपे का गाळतो पाऊस?

किती तो काळ लोटला

काळात लोटतो पाऊस

टपोऱ्या डोळ्यांच्या सयीने

आजही पेटतो पाऊस

तिच्यासारखाच सवयीने

माझ्याशी भांडतो पाऊस

बंद खिडक्या दारे तरी का

उशाशी सांडतो पाऊस??