पाऊलवाट
पाऊलवाट
पाऊलवाट काट्याकुट्यांची
सखे टाक ते पाऊल हळुवार
घुसेल काटा कोमल पायात
काढ ओढून त्याला अलवार
बळीराजासाठी ही मळवाट
मार्ग सत्याचाच नित्य धरुनी
रोजच काटे जीवनात असती
चालतो सदा पायवाटेवरूनी
खाचखळग्यातुन सरकत जाई
पाऊलवाट ही मध्यान्ह रातीची
पायवाट असे दऱ्याखोऱ्यातली
बेधूंद करणाऱ्या अबोल प्रीतीची
अंगाखांद्यावर खेळुन गेलेय तिच्या
माझे अल्लड अवखळ हे बालपण
कधी दुखवले नाही वाटेने मजला
पसरली रानफुले येता मज यौवन
सुटला घमघमाट या रानफुलांचा
गावच्या सानुल्या पाऊलवाटेवर
मृदगंधही या शिवारात दरवळला
तरंग उमटला नदीच्या या लाटेवर