पाखरांची शाळा
पाखरांची शाळा
वडाच्या झाडावर भरली
पाखरांची एकदा शाळा
अआइई अक्षर शिकायला
सारेच पक्षी झाले गोळा
गुरुजी बनले हिरवे पोपट
विठु विठु जप करत बसले
कावळा आला धापा टाकत
सारे पक्षीगण त्याला हसले
कोकिळा आली गुणगुणत
बोलली शिकवा एक गाणे
जोशातच आले मिठूमिया
गाऊ लागले नवनवे तराणे
एवढ्यात चिवचिव चिमण्या
कलकलाट करतच आल्या
गुरुजींचे बोलणे ऐकायला
पुढे पुढे त्या करू लागल्या
पाय आपटूनच गुरुजींनी
सर्वांना मग गप्प बसविले
साळुंक्यांनी उगा साऱ्यांना
विनोदच करून हसविले
इतक्यात पांढरेशुभ्र बगळे
आले घेऊन डाळिंबाचे दाणे
गुरुजींच्या तोंडास सुटे पाणी
पोट दुखण्याचे करती बहाणे
लांडोरीताई आल्या ठुमकत
बोलल्या नाचू का आता मी
पोपटरावांना पळून जायची
मिळालीच संधीच मग नामी
बोलले पहा सारेजण हा नाच
येतोच परत न्याहारी करून
दंगले सारेच नाच पाहण्यात
गुरुजी पळालेच झाडावरून