मुली सुख लाभो तुला...

इवल्याशा पावलांनी लक्ष्मी आली

सुंदर कळी अंगणी उमलली

आनंदाने जग न्हाऊन निघालं

देवाने लाघवी कन्यारत्न दिली ||१||

सुख लाभो तुला जीवनी

म्हणुनी खूप कष्ट मी केले

सारे हट्ट गोडवे तुझे पुरविले

तळहाताच्या फोडासम जपले ||२||

पाहता पाहता लेक माझी

मोठी नि जबाबदार झाली

लग्न करण्याची वेळ आली

दोन घरांना जोडणार चिमुकली ||३||

आला तो दाटलेला क्षण

खूप घट्ट केलं बापाचं मन

योग्य वर पाहुनी परीला

केले शुभमंगल कन्यादान ||४||

प्रत्येक क्षणी सुख लाभो तुला

संसार सुखाचा होवो तुझा

सतत हसत नि आनंदी राहा

इतकच मागतो हा बाप तुझा ||५||