मुक्त मी!

उघडली दारे ज्ञानाची

घेते आज मोकळा श्वास

ज्योती-सावित्रीच्या कष्टाने

आले आज कवेत आकाश

होती कधीचे बंधन सारे

बंदिस्त पिंजर्‍यात पाखरे

वाटा प्रगतीच्या चालतांना

सभोवती निरक्षरता फास

ज्योती-सावित्रीच्या........

बेड्या तोडुन परंपरेच्या

गुलामीच्या, विषमतेच्या

मुक्त मी जगते आहे

घेऊन एक मनात ध्यास

ज्योती-सावित्रीच्या.......

ज्ञान-विज्ञान, समाजसेवा

वाटे आज सार्‍यास हेवा

देशासाठी गाळत घाम

सार्थकी ठरवत त्यांचा विश्वास.

ज्योती-सावित्रीच्या कष्टाने

आले आज कवेत आकाश