मन

सागर असतो अथांग तरीही

धडकेने लाटेस उसळतो

खळबळ करुनी अंतरंगी तो

पकडून, जखडून तिला ठेवतो

आकाशी विहरता पाखरे

म्हणती आपले विशाल अंगण

चंद्र तारका टिमटिम करती

नक्षत्रांना दिधले आंदण

देहामध्ये होते जेव्हा

कधी कधी गुलबक्षी सळसळ

देहाहुनही मला वाटते

मनातले मन हे अवखळ !!

विचारातल्या मनात राहे

नियतीचे हे सुरेख कोंदण

मन हलके अन अवखळ भारी

तोडून पळते सगळे रिंगण

तोडून बघते सगळे रिंगण