मन एक सवंगडी

चाले मनाचा मनाशी 

एक सुखद संवाद 

नाही कुणी प्रतिवादी 

नाही कुठलाच वाद

थांब घडीभर मना

नको होऊ रे बेताल 

तुझे धावणे वेगाने 

होती जिवाचे या हाल

अरे! ऐक ना जरासा 

थांब थांब पळभर

बंद पापणीच्या आड

स्वप्न दडले सुंदर 

वेड्या मना धाव तुझी

साता समुद्राच्या पार

भारी शिणले मी आता

विसावते क्षणभर

बालपण आठवते

काही शोधू रे पाहते

झुले उगाच हिंदोळा 

मन झुलत राहते

आज तुझ्याविन मना

मज सखा ना सोबती

तुझ्या संगती सरती

माझ्या दिस अन् राती

मन वाटे कधी माझे

आहे एक बंद कुपी

सुख दुःख तिच्यामधी

सारे दडुनी राहती

मला वाटते आताशा 

मन एक सवंगडी

अनमोल अशी साथ

मनाचीच हरघडी