मित्रत्व / नातं मैत्रीच

मित्रत्वाचा धागा सुंदर

गुंफून होतो हार

वसा त्यातला एक उकलता

हृदयाचे खुलते दार

या धाग्याचे रंग अनोखे

खजिल होतो इंद्रधनू

रंग तयाचा जरा छिडकता

क्षणात पान्हावते धेनू

जरी दिव्यातली वात सानुली

अंधार पळतो पार

अन् तुक्याचा अभंग होते

त्याच सुताची तार

निसर्ग तोही मित्र आपुला

सर्व गुरुंचा सार

आभाळाची संगत धरता

विवेक फुलतो फार

असे असावेत सखे सोबती

मित्रत्वाचे नाते

एक दुजाचा श्वास बनता

संकट लागते कोते