मी ना अमृता ..

अमृतासारखं ..

तुझ्या उघड्या पाठीवर 

मी 'साहिर'लिहिणार नाही .

किंवा तू चहा पिऊन ठेवलेल्या 

कपाला मी ओठही लावणार नाही .

अशरीरी प्रेम ..

वगैरे वगैरे उपाध्यापण लावणार नाही .

मी अमृता नाही अन् तू इमरोज ..

कारण ..माझ्या आयुष्यात ..साहिर नव्हता .

थोडंसं धाडसच हेही म्हणण्याचं .

पण आता हे सगळं 

बदलायला हवं ना?

'मैत्री' च्या व्याख्येचा परीघ  

थोडा रुंदावायला हवा ना?

त्याच त्या रुढी, कल्पना 

आकुंचित वृत्ती ..

सगळं स्वच्छ असून .. 

आक्रसायला होतं .

मनातल्या विचारांना 

अभिव्यक्ती स्वातंत्र्य 

मिळायला हवं ना ?

हे बोलण्याचं 'धाडस'

करतेय मी ..

कारण ..

सखा फक्त 'कृष्ण'च होऊ शकतो ..

असं नाहीये हे उमगलं होतं 

स्वानुभवानं ..

तुझ्या रुपानं सखा मिळाला तेव्हाच ..