मी धुक्यात वाट पाहताना...

मी धुक्यात वाट पाहताना

धुक्यानेच वाट दाखवली

हाताने हाताला कुरवाळताना

पावलांची थरथर जाणवली

वाटेतल्या अंधाराला कवटाळुन

उजेडाची शाल पांघरली

किर्र करणाऱ्या रस्त्यामधुन

चाचपडतं पावलं चालली

हिरव्या पानांवरच्या दवांनीही

सर्द ओलावली सावली

ही पहाट केशरी उमलताना

काया सुवर्णमय जाहली

तो नितळ आकाशातून पाहताना

चादर धुक्याची किरणात अडकली

मी धुक्यात वाट पाहताना

वाट धुक्याची वाटते वितळली...!!