मैत्रीचे मोल

दोस्तीचे नाते नाजूक खूप 

जणू वरण भातावर साजूक तूप 

मैत्री ना पाही रंग रूप

प्रेमाचा वाहे झरा ||१||

पण मैत्रीचे महत्त्व होतेय कमी

मैत्रीच तर असे जगण्याची हमी 

मैत्रीत नसे तुम्ही आम्ही

आपलेच असती सारे ||२||

मैत्रीची दुरावस्था होतेय 

दोस्ती दोस्तांपासून तुटतेय 

यारांची यारी हरवतेय 

आपणच कारण ||३||

मित्रांना बोलवावे 

निवांत का बसावे

Pubg खेळावे

सगळे मिळूनी ||४||

Whatsapp ला मित्रांची धमाल

Insta वर Likes ची कमाल

त्यातच जर रमाल 

मिळेल का खरी मैत्री ||५|| 

Facebook ला मित्र हजार 

झाला आपल्याला आजार 

खाटेवर एकटाच बेजार 

भेटायला कोणी येईना ||६||

मित्र व्यसन लावी

त्याच्या हाती का द्यावी 

आपण आपलीच चावी 

फरक जाणून घ्यावा ||७||

मित्र जो खर्च करी 

तोच सगळ्यात असे भारी 

त्याच्याच मागे फिरती सारी

दिलदार मनाचा राजा माणूस ||८||

नडेल त्याला फोडा 

दोस्ती म्हणजे राडा

लावा कानाला खडा 

सारासार विचार करावा ||९||

मैत्रिणींनी भेटावे 

गोड गोड बोलावे

भले बुरे सुनवावे

पाठीमागे ||१०||

वस्तू वाटून घेती

एका डब्यात जेवती 

छोट्या भांडणाने दुरावती

अश्या मैत्रिणी काय कामाच्या ||११||

Friendship Day ला एकत्र यावे

Band बांधुनी हात सजवावे 

Post नि status टाकुनी गावे 

दोस्तीचे गुणगान ||१२||

दोस्तांच्या वाढदिवसाला 

तोटा नाही गोंधळाला 

Cake फसवा तोंडाला

द्याव्या लाथा बुक्क्या ||१३||

मैत्री दोस्ती नि यारी 

सगळे झोलझाल करी

झाली नुसती दुनियादारी

साऱ्यांनाच कळते सारे ||१४||

मैत्री कोणाशी करावी 

सांगत कोणाची धरावी 

साथ कोणाला द्यावी 

असू द्यावे भान ||१५||

मित्र चतुर असावा 

त्याने जीव लावावा 

प्रसंगी कान ही पिळावा

बापासमान भासे ||१६|| 

मैत्रीण प्रेमळ असावी

तिने काळजी करावी 

संकटाला न घाबरावी 

आईच जैसी ||१७||

असे लाभतील ज्यास दोस्त 

जीवन त्याचे बनेल मस्त 

जखमाही होतील दुरुस्त

नसे कसलीही चिंता ||१८||

मैत्री अशी असावी 

तिथे स्वार्थाची गरज नसावी

अहंकाराची चाहूलही न लागावी

निरपेक्ष प्रेमाची निशाणीच जणू ||१९||

मैत्रीचे जाणावे मोल 

न जाऊ द्यावा तोल 

दोस्तीचा विषयच खोल 

जाणुनी घ्यावे ||२०||