माय मराठी

मी कवी मराठमोळा ,

मराठीचा , मी शिलेदार |

प्रसिद्धीची हाव नको ,

नको मज , कौतुकाचा भार |

मी रसिक शब्दांचा ,

शब्दातून मांडतो ऊन कोवळे |

कधी युध्दाची ललकार ,

तर कधी मांडतो , वेदनांचे सोहळे |

कधी मी पुकारतो युद्ध ,

कधी पाहतो पिंपळात बुद्ध |

दया , क्षमा अन् शांतीचा ,

कधी मांडतो विचार शुद्ध |

मी मांडतो सत्य ठाम ,

कधी केवळ कल्पनेचा कुंचला |

अटकेपार विचार नेता ,

शब्दचि देई बळ मला |

माझी कविता मथुरेत नाही ,

नाही कदापि , ती काशीत |

संपला कुठे , वनवास हिचा ,

म्हणून तर ही , आहे अजून अप्रकाशित |

मी मराठी , महाराष्ट्र माझा ,

इथे अनेक भाषांची दाटी |

मी आसक्त होता , तोल जाता ,

जपते मला , माय मराठी |