माझे बालपण

विलक्षण आठवणींच्या हिंदोळ्यावर

चाळीतील बालपणीची रंगीबेरंगी चित्रे सजली

नातलगांच्या प्रेमळ,आपुलकीच्या सहवासात

सुंदर नक्षीदार फुलांची रांगोळी नटली १

चाळीतील अंगणात चाफ्याचा दरवळ

त्यावेळी जेवणाची अंगतपंगत रंगली

गच्चीवर पापड सांडगे चोरून खायचे

तरीही मित्रांची सोबत मदतीला धावली २

विटीदांडू,लगोरी,गोट्या,लंगडी, कॅरम

सारेच खेळ माझ्या भारी आवडीचे ठरले

पावसाळ्यात पाण्यात सोडायच्या होड्या

असे बालपण माझे सुखानंदाने भारले ३

दुपारी आवळे,चिंचा,बोरे,पेरू,कैरी तोडायचे

बर्फाचा गारगार गोळाही आवडीने खायचा

आणि विहिरीत डुबक्या मारत पोहायचे

व्हरांड्यात दुपारी मित्रांसोबत अभ्यास करायचा ४

शेजारच्या काकूंना फुले तोडून द्यायची

एकमेकांचा सांत्वनाने सांभाळ करायचा

ताईच्या लग्नाला तारांबळ सार्‍यांची 

तेव्हा सर्वांच्याच डोळ्यात अश्रूंचा पूर यायचा ५

खेळांच्या नादाने व्यायाम चालायचा

मदतीची सवय सर्वांचा एकोपा दाखवायची 

लहान वयातच दुसऱ्यांचा विचार मनात यायचा

अशी बालपणीची सवय लागली कायमची ६

असे माझे बालपण संस्कारांनी फुललेले

सायंकाळी शुभंकरोती म्हणतच बहरलेले

नात्यांचे रंगीबेरंगी धागे घट्टपणे विणलेले

आता मोठेपणी माणुसकीच्या आठवांनी भारलेले ७