कुंकू

रोज रोज कुंकू लावते

मी तुमच्या नावाचं

अस्सल माती सोडून आले

मी तुमच्यासाठी माझ्या गावाचं

शहरात आले भितभित

मी अडाणी तुमच्या पाठी

ह्यो रस्ते आणि बिल्डिंगा

ध्यानात ठेवण्यासाठी किती

मारु मी पदराला माझ्या गाठी

असला नट्टापट्टा धनी बघा

मला नाही जमत

चारचौघी दारात जमवून

गुलूगुलू बोलल्याखेरीज

मला नाही गंमत

तुम्ही जाताना ऑफिसात 

दार लावून जाता

किती जोर लावते

तरी मला कडी नाही निघत

एकटी घरात बसून

त्या टीव्हीतली भावल्या

बघून किती मी हसू

असे रोज रोज झाले ना

एक दिवस मीच तुम्हाला 

कार्टून गत दिसू

तुम्ही गेल्यावर मी 

घरात एकटीच पडते

माझ्या मातीची मला 

लई आठवण येते

एका कोपऱ्यात बसते

आणि मनसोक्त रडते

खरं सांगते धनी तुम्हाला 

माझे मन इथे नाही हो रमते