कोकिळेचे कुहू कुहू ---

वसंताचे आगमन

चिंचा, बोरे चाखायचे

कोकिळेचे कुहू कुहू

गोड बोल ऐकायचे       १

सृष्टीतील चैतन्याने

हिरवाई फुललेली

कोकिळेच्या कूजनाने

आमराई खुललेली       २

आनंदाचा शिडकावा

ऋतुराज आल्यावर

कुहू कुहू स्वरसाज

प्रफुल्लित झाल्यावर     ३

मुग्ध मंजुळ स्वरांनी

मिळे अक्षय आनंद

मोगऱ्याच्या सुगंधानी

दरवळे सुखानंद        ४

कुहू कुहू हुंकाराने

कोकिळेची ललकारी

ऋतू वसंत फुलता

निसर्गाची अदाकारी     ५

सुरावट कुहू कुहू

मंत्रमुग्ध करणारी

पक्ष्यांचीही किलबिल

चराचरी हसणारी       ६