खंत पाखराची

अरं पावसा पावसा

असा का रं रुष्टला?

घरट्यात तान्हं माझं

त्याला चारा रं कुठला!

सारं शिवार मी हिंडलं

पाणी टिपूस ना गवसलं

रानं भळ्यांनी माखली

झाडं ओकी-बोकी झाली

चारा-पाणी ना जनावरा 

दीनवाण्यांची दैना उठली

घालमेल धन्याच्या जीवाची

अश्रुधारा वाहती गाली

अन्नदाता माझा शेतकरीदादा

कर्जाच्या ओझ्यानं वाकला

भाळी माती-अबीर लावूनी

चातकासम बघतो ढगाला

चराचरात मेघराजा

नवचैतन्य सळसळू दे

झाडं-वेली-पानं-फुलं

ताजीतवानी होऊ दे

हालगी-लेझीम तालावर

अन्नदाता माझा नाचू दे

आम्हा पाखरांच्या गाण्यानं

सारा आसमंत गुंजू दे

अरं पावसा पावसा

असा पडून जा एकदा

मुसळधार पावसाचं स्वप्न

खरं करुन जा एकदा