काळीज चिरून जाताना

तुझ्या आठवणींपासून सखे 

दूर निघून जाताना 

वेदना असह्य होतील आता 

काळीज चिरून जाताना ||0||

आठवण देईल तुझी अशी 

प्रत्येक गोष्ट सोडणार मी 

एकटेपणाचं पुन्हा हे 

कफन आता ओढणार मी

मुक्त व्हायचं आहे मला 

मागे फिरून जाताना 

वेदना असह्य होतील आता 

काळीज चिरून जाताना ||1||

किती भावना कवटाळू 

किती आठवणी जाळू 

फिनिक्स झाल्यात आठवणी 

किती मनातून गाळू 

स्मशानशांततेत आता 

पुन्हा विरून जाताना 

वेदना असह्य होतील आता 

काळीज चिरून जाताना ||2||

कोण होतो मी याचा 

तुला फरक पडणार नाही 

हृदयात तूझ्या प्रेम जागेल 

असं कधी घडणार नाही 

विष तूझ्या विरहाचं 

हृदयात जिरून जाताना 

वेदना असह्य होतील आता 

काळीज चिरून जाताना ||3||