काही सांगता येत नाही

कुणाचं मन कुठे हरवेल 

काही सांगता येत नाही 

हृदयाच्या हालचालीचे ठोकताळे 

काही मांडता येत नाही ||0||

शेवटपर्यंत काही पक्का 

अंदाज लागत नाही 

आपल्याला कळेल गुपित 

असं मन वागत नाही 

हृदयावर टांगती तलवार 

अशी टांगता येत नाही 

हृदयाच्या हालचालीचे ठोकताळे 

काही मांडता येत नाही ||1||

अचानक एक दिवस मग 

बेचैन व्हायला लागतं 

आता मात्र ते सीमेबाहेर 

तुमच्या जायला लागतं 

समाजाच्या विश्वात आता 

त्याला रांगता येत नाही 

हृदयाच्या हालचालीचे ठोकताळे 

काही मांडता येत नाही ||2||

जीवनाचे नियमच एव्हाना 

बदलून जात असतात 

कोणत्याही संकल्पना इथे 

कायमच्या नसतात 

मन मारून अशा वेळी 

काही वागता येत नाही 

हृदयाच्या हालचालीचे ठोकताळे 

काही मांडता येत नाही ||3||

सतत त्याच व्यक्तीचं 

चित्र डोळ्यसमोर येतं 

सतत तिच्या अवतीभवती 

आपलं मन खेचून नेतं 

तिच्याकडे तिचं प्रेमही 

काही मागता येत नाही 

हृदयाच्या हालचालीचे ठोकताळे 

काही मांडता येत नाही ||4||

सतत विचार मनात तिचा 

घोळत राहत असतो 

बंद डोळ्यानेही तिला मी 

स्पष्ट पाहत असतो 

झोप नाही रात्रभर आणि 

काही जागता येत नाही 

हृदयाच्या हालचालीचे ठोकताळे 

काही मांडता येत नाही ||5||