काही काही

काही काही कविता काय असतात

वाचताच सरळ काळजाला भिडतात

डोळ्यातील पाणीच उपसून काढतात

रात्रीची झोप उडवून टाकतात

काही काही कविता काय असतात

आश्चर्याचा प्रचंड धक्का देतात

विचारांचे डोक्यात वावटळ उठवतात

आपल्याला आपली ओळख करवून देतात

काही काही कविता काय असतात

टराटरा चेहर्‍यावरचे मुखवटे फाडतात

सत्याची सत्त्वपरीक्षा घेतात

खोट्याला समाजात नग्न करतात

काही काही कविता काय असतात

वाचताच गर्वाचे हरण करतात

अंतर्मनाचा आरसा होतात

लाजेने मान खाली घालायला लावतात

काही काही कविता काय असतात

कधी कधी अव्वाच्या सव्वा खोटी स्तुती करतात

कोळशाला पौर्णिमेच्या चंद्राची उपमा देतात

काही म्हणजे काहीही कल्पना करतात

काही काही कविता काय असतात

भित्र्याला धैर्यवान करतात

आत्मविश्वास ठासून ठासून भरतात

जिद्दीने जगण्याची उमेद बांधतात

काही काही कविता काय असतात

निराधाराचे आधार होतात

तळागाळातल्यांना आकाशात भरारी मारायला लावतात

मुंगीला चक्क हत्ती करून सोडतात

काही काही कविता काय असतात

निराश झालेल्यांना नवीन आशा देतात

हतोत्साहित झालेल्यांना उत्साहाने ओतप्रोत करतात

शाब्दिक संजीवनी होतात

काही काही कविता काय असतात

ह्रदयात प्रेमाचा पाझर फोडतात

चांगल्या भल्या माणसाला वेड लावतात

चक्क दगडात देव दाखवतात

काही काही कविता काय असतात

माणसाला निराश करतात

उत्साही माणसाला निरुत्साही करतात

सुखी माणसाला दुःखी करतात

काही काही कविता काय असतात

कवीच्या कल्पनेचे खेळ असतात

दिवसा चंद्र आणि रात्री सूर्य असतात

कवीच्या म्हशी आकाशात उडत असतात

काही काही कविता काय असतात

कवीच्या डोक्यातील वळवळ असतात

कधी पचत नाहीत तर कधी पचतात

जाऊ द्या ना, डोक्याला शीण आणतात