जान्हवी....एक जीवनवाहिनी

नदी वाहते जरी संथ

तरी तिचं कार्य आहे प्रचंड

तिच्याकडून एक नक्कीच शिकावं

काही न ठेवता स्वतःकडे सतत वाहत राहावं

गावच्या नदीचा वेगळाच थाट

कधी वाहते घेऊन नागमोडी वाट

तिचे कार्य आहे खूप महान

भागवते साऱ्या जीवांची तहान

नदीकाठच्या मंदिराला ती स्पर्शून जाते

जणू भगवंताला ती पुजून येते

तिच्या पाण्यावर सर्व करतात शेती

पावसात पूर आल्यावर वाटते मात्र भीती

डोंगर दर्या पार करून

मिळते ती सागराला

अथक प्रयत्नानंतर

यश येतं तिच्या संघर्षाला